Problem under debatt: Olaug Nilssen

Olaug Nilssen er ikkje ein forfattar som vegrar seg for å behandle utfordrande tema. Då ho fekk sitt gjennombrot med romanen Få meg på for faen i 2005, skreiv ho om tabu knytt til ungdom og seksualitet. Mens dei tre siste romanane hennar alle handlar om barn som krev ekstra omsorg.

I den sjølvbiografiske romanen Tung tids tale (2017), som ho fekk Brageprisen for, fortel ho med ei uvanleg openheit om det å vere mor til eit sterkt funksjonshemma barn, eit tema som blei vidareført i Yt etter evne, få etter behov (2020). Hennar siste roman, Uønska åtferd (2023), handlar om ei familie der livet blir fullstendig dominert av omsorgsbehovet til ein psykisk utviklingshemma son, som også byrjar å utagere seksuelt.

Kan desse romanane lesast som uttrykk for noko politisk prosjekt? Og kvifor har ho nettopp valt skjønnlitteraturen som sjanger for å utfordre oss med problemstillingar rundt omsorg, morsrolla, seksualitet og ein velferdsstat som ikkje alltid stiller opp?

Olaug Nilssen blir intervjua av programansvarleg ved biblioteket, Erlend Liisberg.

«Problem under debatt» er ein ny arrangementserie frå Voss bibliotek som undersøkar kor levande norsk samtidslitteratur er i dag, på grunnlag av det gamle premisset frå litteraturforskaran Georg Brandes (1842-1927 om at «Det, at en litteratur i vore dage lever, viser sig i, at den sætter problemer under debat». Serien er støtta av Kulturrådets ordning for litteraturformidling.